„დაბადებიდან ფეხზე პრობლემა მაქვს, რის გამოც შშმ პირის სტატუსს ვატარებ. სტუდენტი ვიყავი, როცა დედა გარდამეცვალა, სახლში დაბრუნება მომიწია. მერე დაიწყო პრობლემები - ჩემს გაგდებას ცდილობდნენ ჩემივე სახლიდან. იყო შემთხვევბი, როდესაც საზოგადოების სტიგმის მსხვერპლიც გამხდარვარ - რომ ჩემი აზრი, სხვის აზრზე, ნაკლებ მნიშვნელოვანია. ჩემი ერთადერთი სტაბილური შემოსავალი 190-ლარინი შშმ პირის პენსია იყო, რაც ძირითად საჭიროებებსაც არ ჰყოფნიდა.“ – ლიანა კვაჭაძე, 55 წლის, RISE Georgia პროექტის მონაწილე

ლიანა საკუთარ ოჯახში წლების განმავლობაში განიცდიდა ეკონომიკურ ძალადობას.  ASB საქართველოს მიმდინარე პროექტის -უთანასწორობის შემცირება და კრიზისში მყოფ ქალთა მხარდაჭერის გაძლიერება - დახმარებით მან დასაქმება შეძლო და ახლა ეკონომიკურად უფრო მეტად დამოუკიდებლად გრძნობს თავს. ლიანა პროექტის შესახებ ინფორმაციას თვითდახმარების ჯგუფის შეხვედრაზე გაეცნო.

„პროექტის წყალობით დავიწყე მუშაობა – ახლა დღის ცენტრში დიასახლისად ვმუშაობ. ჩემი ხელფასი მედიკამენტებსა და კომუნალურ გადასახადებს ფარავს; ასევე მაქვს შესაძლებლობა, ბუღალტერიის კურსიც გავიარო და მომავალში სხვა სამსახურიც მოვძებნო. მადლობელი ვარ ამ მხარდაჭერისთვის.“ - ამბობს ლიანა.

პროექტის ფარგლებში დასავლეთ საქართველოში თვითდახმარების 29 ჯგუფი მუშაობს;  ჯგუფების მიზანია აამაღლონ ცნობიერება ოჯახური და სხვა ტიპის ძალადობის შესახებ, გაავრცელონ საინფორმაციო ფლაერები და ჩაატარონ ყოველთვიური შეხვედრები თემის შიგნით – საზოგადოების ცნობიერების ამაღლებისა და ძალადობის მსხვერპლთა გამოვლენის მიზნით. თითოეულ ჯგუფში სხვადასხვა პროფესიის 6-8 მოხალისე-მოქალაქეა გაერთიანებული.

„ჯგუფის წევრები არიან აქტიური მოქალაქეები, რომლებსაც ძალიან უყვართ თავიანთი თემი. ეს შეხვედრები მნიშვნელოვანია, რადგან სტიგმა ჯერ კიდევ დიდ დაბრკოლებად რჩება. ზუსტი და ხელმისაწვდომი ინფორმაცია ეხმარება ადამიანებს, მიიღონ ინფორმირებული გადაწყვეტილებები.“- ამბობს მაია ჯაში, პროექტის სოციალური მუშაკი. 

პროექტი RISE Georgia ASB-ს მიერ, საქართველოს სამარიტელთა კავშირთან პარტნიორობით, ხორციელდება. პროექტი მიზნად ისახავს კრიზისში მყოფი ქალებისა და გოგოების სოციალური და ეკონომიკური მხარდაჭერით გაძლიერებას. ის 2026 წლის მარტამდე გაგრძელდება და დაფინანსებულია ავსტრიის რესპუბლიკის სოციალური დაცვის, ჯანმრთელობის, ზრუნვისა და მომხმარებელთა დაცვის ფედერალური სამინისტროს მიერ.