საკუთარი სახლის, წარმატებული ბიზნესისა და წლების განმავლობაში შექმნილი ცხოვრების უკან დატოვება არასოდეს არის ადვილი. უკრაინაში დაწყებულმა ომმა ალისას და მისი ოჯახს სამშობლოს დატოვება აიძულა. შვილებისთვის უსაფრთხო გარემოს ძიებაში ისინი საქართველოში, ზუგდიდში ჩამოვიდნენ, იმ იმედით, რომ შეძლებდნენ ყველაფრის თავიდან დაწყებას.

ომამდე ალისა და მისი ოჯახი ბოსტნეულისა და ციტრუსების მაღაზიებს, ასევე სილამაზის სალონს ფლობდნენ. საქართველოში ჩამოსვლის შემდეგ კი ცხოვრების დაწყება სრულიად ნულიდან მოუწიათ.

ახალი შესაძლებლობების ძიებისას ალისამ ინტერნეტში ASB-ის პროფესიული განათლებისა და გადამზადების (VET) პროგრამის შესახებ შეიტყო. მან განაცხადი შეავსო და მალევე კურსის მონაწილე გახდა.

მიუხედავად იმისა, რომ მამაკაცის თმის შეჭრის მიმართულებით უკვე ჰქონდა პროფესიული გამოცდილება, ალისას სურდა ცოდნის გაფართოება და ქალის თმის სტილისტის პროფესიის დაუფლება. სასწავლო კურსის განმავლობაში მან შეიძინა ახალი პროფესიული უნარები, დაეუფლა თანამედროვე ტექნიკებს, მიიღო საქმიანობისთვის საჭირო პროფესიული ინსტრუმენტები და სწავლობდა გარემოში, სადაც მუდმივად გრძნობდა მხარდაჭერასა და წახალისებას.

VET-ის პროგრამამ ალისას მხოლოდ პროფესიული ცოდნა არ შესძინა. ის მისთვის საკუთარი შესაძლებლობების დაჯერების, რწმენის აღდგენისა და ახალ საზოგადოებაში ინტეგრაციის მნიშვნელოვანი ეტაპიც გახდა. პროგრამის ფარგლებში მან მეგობრები გაიჩინა, თავდაჯერება დაიბრუნა და თანდათან იგრძნო, რომ ახალ გარემოში საკუთარი ადგილი იპოვა.

„პირველი დღიდანვე ვიგრძენი, რომ აქ მიმიღეს და მხარს მიჭერდნენ. VET-ის პროგრამამ გაცილებით მეტი მომცა, ვიდრე მხოლოდ პროფესიული ცოდნა. მან საკუთარი თავის რწმენა დამიბრუნა, დამეხმარა ახალი ადამიანების გაცნობაში და მაჩვენა, რომ ახალ საზოგადოებაშიც შემიძლია საკუთარი ადგილის პოვნა,“ — ამბობს ალისა.

მისმა მონდომებამ და შრომამ შედეგი მალევე გამოიღო. კურსის დასრულების შემდეგ იმ სილამაზის სალონის მფლობელმა, სადაც პრაქტიკულ სწავლებას გადიოდა, სამსახური შესთავაზა. დღეს ალისა იმავე სალონში თმის სტილისტად მუშაობს. კურსზე მიღებული ცოდნა მისთვის არა მხოლოდ სტაბილური შემოსავლის წყარო, არამედ ახალი ცხოვრების მტკიცე საფუძველი გახდა.

„როდესაც კურსის დასრულების შემდეგ სამსახური შემომთავაზეს, ვიგრძენი, რომ ჩემს ცხოვრებაში ახალი ეტაპი დაიწყო. ამან მომცა იმედი და მოტივაცია, რომ მომავალს ოპტიმისტურად შევხედო,“ — ამბობს ის.

დღეს ალისა სხვა ქალებსაც მოუწოდებს, არ გაუშვან ხელიდან მსგავსი შესაძლებლობა.

„ყველა ქალს, რომელიც VET პროგრამაში მონაწილეობაზე ფიქრობს, ვურჩევ, არ შეეშინდეს პირველი ნაბიჯის გადადგმის. ახალი უნარების შეძენა ახალ შესაძლებლობებს გიხსნის, გაძლევს თავდაჯერებას და ნამდვილად შეუძლია შეცვალოს შენი ცხოვრება.“

შენიშვნა: ბენეფიციარის კონფიდენციალურობისა და უსაფრთხოების დაცვის მიზნით, გამოყენებულია შეცვლილი სახელი — „ალისა“. ასევე, შეცვლილია რამდენიმე პირადი დეტალი, რათა დაცული იყოს მისი ანონიმურობა, თუმცა სრულად შენარჩუნდეს მისი გამოცდილებისა და ASB-ის პროფესიული განათლებისა და გადამზადების (VET) პროგრამის გავლენის არსი. 

VET პროგრამა განხორციელებულია პროექტ RISE საქართველოს: "უთანასწორობის შემცირება და კრიზისში მყოფ ქალთა მხარდაჭერის გაძლიერება" ფარგლებში, რომელიც ფინანსდება ავსტრიის რესპუბლიკის სოციალური დაცვის, ჯანმრთელობის, ზრუნვისა და მომხმარებელთა დაცვის ფედერალური სამინისტროსა და ASB გერმანიის მიერ.